Ku wa 10 Nzeri 2010, i Remera kuri Hotel Alpha Palace hazateranira inama izahuza abacamanza b’inkiko zisumbuye n’iz’ibanze, abanditsi b’izo nkiko ndetse n’abandi bakozi bunganira inkiko ziri mu ifasi y’urukiko rukuru n’icyicaro gikuru. Iyo nama ikaba izaba igamije gusuzumira hamwe ibyagezweho n’ibitaragerwaho mu gihembwe cya kabiri cy’ubucamanza.

Ku wa 31 Kanama 2010 ni bwo umutangabuhamya ANAW yarangije gutanga ubuhamya mu rugereko rwa kabiri rw’urukiko rwa mbere rw’iremezo mu rukiko mpuzamahanga mpanabyaha rwashyiriweho u Rwanda ruri Arusha, bikorwa urwo rukiko rurangije  kumva no gutega amatwi abatangabuhamya b’ubushinjacyaha mu rubanza ruregwamo Ngirabatware Augustin wari Minisitiri w’Igenamigambi mu gihe cya Jenoside yakorewe abatutsi mu Rwanda muri Mata 1994.

Abakurikiranwaho ibyaha byo kumunga ubukungu bw’igihugu bagiye gufatirwa ingamba zikomeye ku bufatanye  n’inzego zose bireba. Ibyo byatangajwe na Ntete Jules Marius Umugenzuzi Mukuru mu Bushinjacyaha Bukuru ku wa  02 Nzeli 2010 mu nama yaberaga muri Hoteli le printemps mu Karere ka Gasabo mu Mujyi wa Kigali, igamije kurebera hamwe uko ikurikiranwa ry’ibyaha bimunga ubukungu bw’igihugu cyangwa bw’ibigo rihagaze.